پێشانگای عێراقی نێودەوڵەتی و هەرێمایەتی
خوێنەران و بیسەران و بینەران و گوێگران و تەماشاكەران و خوێندەوارانی دنیا، ئاگادار ئەكەینەوە، كە بۆ یەكەمجارە لە مێژوودا پێشانگای لەم نەوعەی ئێراق دەكرێتەوە بە ئەنواع مواسەفاتی عەجیب و ئەنواع عەلاماتی ئاخر زەمانەوە .
وەك:
• هەرچی بڵێی لە كەرەستەی مەمنووعی وڵاتانی دراوسێ كە لای خۆیان بە هەر كەسێكی بگرن شتێكی لێ دەكەن، لەم پێشانگایەدا هەیەو ئەلحەق زۆریشە.
• هەرچی چەكو ئەسلەحەی شەرق و غەربی تاقی نەكراوە هەیە، لێرە بەتاقیكردنەوەوە دەیفرۆشن.
• ئەم پیشانگایە فوول فوول بووە لە، عەبای سووری و نیقابی سعودی و مانتۆی ئێرانی و هیچیشیان لەرووی شەرعیەوە ئیعتراف بەوی تر ناكات.
• لەم پیشانگایەدا شتە قەڵبە باشەكانی دراوسێ خاسەكان بە هەرزانترین سیعری ئەجردانەوە دەست دەكەون.
• پڕە لە ئەشیای تەقەمەنی یاری منداڵانە بەگوللەوە، هەتا منداڵانی عێراقی وەك جیلێكی گوێرایەڵی موستەقبەل فێری موتیعی ببن .
• ئەم مەعرەزە فوولە لە ماچی درۆو تەوقەی ناعیلاجی و ئیتفاقی پەشیمانی و زەردەخەنەی بە رقەوە، هەمووشیان بە قیستی ماوەی بەینی دوو ئینتیخابات دەدرێن.
• شەو و رۆژ كراوەتەوەو لەیل و نەهاری بۆ نییە و لە عوتلەكانیشدا هەر مەفتوحە، كەی بتەوێت دەتوانی بچیە ژوورەوەو بە ئارەزویی خۆشت لێی دەربچیت.
• هیچ شتێكی ئەم پیشانگایە ئێكسپایەر نابێت، چونكە نە كاتی درووست بوونی لێ نووسراوەو نەكاتی بەسەرچوونیشی، لەبەر ئەوەی دەزانن كڕیارەكانی ئیمانیان بە زەمەن نییە هەموو كاتێكیان هەر لەلا زووە.
• باشترین جۆری سوێندخواردن و چاكترین نەوعی موئامەرەی تێدا دانراوە، بەڵام تەنها كوتلەكان بۆیان هەیە بیكڕن و شمولی عەوام ناكات.
• لەم پیشانگایەدا باشترین ئامێری درووست كردنی علاقاتی نهێنی و ژێربەژێر بە باشترین مۆدێلی كەس هەقی نەبێت بەسەرمەوە دانراوە .
• لەم مەعرەزە پان و بەرینەدا یەك بست نییە بۆ تەبایی و ئاوو كارەباو جادە و یەك قەترە نییە بۆ لێكحاڵی بوون و بەیەك گەیشتن و بە میكرۆسكۆب و زەرەبین بگەرێی تۆزێ لێبوردنی تیا نادۆزیەوە، دەی بارەكەڵا.