مانگانە تایبەت بۆ گەپ دەینوسێ
ئاخۆ ئێمە دەزانین چی دەكەین ؟ كێ دەتوانێ پێم بڵێ،ئێمە بۆ وا دەكەین؟ بۆ وا بیردەكەینەوە؟
• جاران حكومەت بە پارەی نەفتی كوردستان چەكی دەكڕی ولە خۆمان وخاكەكەمانی سەرف دەكردو شارەكانمان وەكو گوندی ئەفغانی وابوون،كەس نقەی لێوە نەدەهات،ئەمڕۆ كورد خۆی نەوتی خۆی دەردێنێ و دەینێرێتە دەرەوە .عەرەب ووتەی لەزار دەرنایێ،كەچی كورد دنیای هێناوەتە لەرزە لەرز ودەڵێ كورد نەوت دەفرۆشێ وپارەی نەوتەكە بزر دەكاو نایخاتەوە بانكی مەركەزیی عێراقی !
• برادەرێكی هەندەران ڕۆژ تا ئێوارە هێرش دەكاتە سەر پارێزگا گوایە شوێنە دێرینەكانمانی تێك داوە،كەچی هەرخۆی لە نێو نافوورەكانی بەردەم مچكۆ خۆی دابووە بەر بای فێنك پیاوم دەوێ بزانێ عەقڵی ئەو برادەرە لە چ مادەیەك دروستكراوە!
• ئەگەر دەسەڵات بڵێ لە پێناوی كوردستان خۆمان شەت وپەت دەكەین، خەڵك هەر خۆی پێی دەڵێ توخوا ژیانمان مەخەنە مەترسیەوە، برادەر سیاسەت وا نابێ،ئەگەر دەسەڵات بڵێ ئێمە لە گەڵ بەغدا برابەشین و حكومەت تەشكیل دەكەین،هەر خۆمان دەڵێین :ئاخر بەس نیە عیراقچێتی ! ئەگەر دەسەڵات بڵێ پێویستە لە گەڵ دراوسێكانمان دۆست بین،ئەوا هەرخۆمان دەڵێین جا دۆستایەتی بۆ لە گەڵ دوژمنەكانمان بكەین،ئەگەر دەسەڵات گوتی: بۆ نموونە یەكێك لەو دەوڵەتانە ناتوانێ زەڕڕەیێ خاكەی وەتەن داگیر بكات،هەر خۆمان دەڵێین:جا ئێمە تیرو كەوانمان هەیە شەڕی پێ بكەین! ئەگەر دەسەڵات یەكێك لەسەر گەندەڵی بداتە دادگا ئەوا دەڵێن دەسەڵاتێكی دكتاتۆرە، ئەگەر دەنگی لێ نەیەت، دەڵێن: دەسەڵاتێكی گەندەڵە، ئەو برادەرە ڕاستی نووسیبوو( گەندەڵی هەیە بۆیە من هەم)
• شەڕی نێوان سوننەو شیعە حكومەتی شەل كرد، ئەمریكا گوتی: ئەگەر خاس ڕێك نەكەون، حاكمێكی قنجتان بۆ دادەنێم، عەرەب وەك نەبای دیبێ و نەبۆران،كەچی ئێمە بۆ دامەزراندنی حكومەتی عێراقی تەنگەتاو بووینە.باشە حاكمێكی ئەمریكی لە حاكمێك باشتر نیە بە ناوی وەحدەی خاكی عێراقەوە هەڕەشەمان لێ بكات؟
• ڕۆژ تا ئێوارە لە سەر ئەنتەرنێت و گۆڤارو ڕۆژنامە كان جوێن و هێرش وسووكایەتی بە نوێنەرانی حزب وحكومەت دەكرێ، كەچی كەسیان نقەیان لێوە نایێ، هەر لە سەر بودجەی حكومەت پارە بە هەندێك میدیا دەدرێ، كە هەموو ڕۆژێ هێرش دەكەنە سەر حكومەت وحزبەكان،.ئاخۆ كامیان ڕاستن ؟ كامیان سنگ فراوانترن؟پیاو هەیە بڵێ بۆچی وایە؟!!
• كاتێك حكومەت پارە بە سەنتەرو ڕێكخراوو كۆمەڵەو گۆڤارو ڕۆژنامەكان دەدات، دەڵێن گەندەڵیە،كاتێك پارەكە دەبڕێ، دەڵێن: دژی ئازادیی ڕادەربڕینە،كاتێك كەمیان دەكاتەوە، یا دایان دەخات! دەڵێن: دكتاتۆریە،كاتێك میدیای تازە دەردەچێ، دەڵێن: پارەی میللەت بۆ وەرەقەیە،ئەی تەكبیر كوڕی ژیر؟
• وابزانم ئێمە لە یەك كاتدا هەم ڕاست بێژو هەم شێلمان هاوێژین، وەكو ماسیی سەر ئاوو بن ئاو زۆر ووریاو زۆریش گێژین، ئێمە دیموكراتیەتێكمان پێویستە هەم مرۆڤ دۆست بێ، هەمیش مرۆڤ كۆست بێ! ئاخر منیش ئەم جارەیان نازانم ئاوەژوەكەی یا ڕاستەكەی ڕاستە؟؟